ⴳ ⵓⵙⴰⵜⵉ ⵏ ⵜⵥⵍⴰⵢⵉⵏ ⵏⵏⵙ ⵏⵏⴰ ⴷ ⵉⵡⵉⵏ ⵉⵙⴱⴷⴰⴷⵏ ⵏ ⵓⵙⵍⴳⵏ 76.15, ⴷⴰ ⵉⵙⴽⴰⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⵙⵎⵉⴳⴰⵍ ⵏⵏⵙ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵜⵏⴽⵔⴰ ⵙⵔⵙⵏ ⴷ ⵡⴰⵔⴰⵢ ⵙⴳ ⵜⵕⵥⵉ ⵏⵏⴰ ⵉⵥⴹⴰⵕⵏ ⴰⴷ ⵜⵏ ⵜⵍⴽⵎ ⵙ ⵜⵏⴰⵍⵉⵜ ⵏ ⵢⴰⵜ ⵜⵙⵜⵕⴰⵜⵉⵊⵉⵜ ⵉⴱⴷⴷⵏ ⵅⴼ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ.

ⴳ ⵓⵎⵏⴰⴹ ⴰⴷ, ⴰⵔ ⵉⵜⵜⵏⵄⴰⵕ ⵓⵙⵇⵇⵉⵎ ⵅⴼ ⵓⵙⵎⵔⵙⵍ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏⵏ, ⴰⴼⴰⴷ ⴰⴷ ⵜⴳ ⵉⴼⵉⵍⵉ ⵉⵏⵎⴰⵍⴰⵏ ⵏ ⵜⵉⵍⴰⵍ ⵏⵏⵙ ⴷ ⵉⵖⴰⵡⴰⵙⵏ ⵏⵏⵙ. ⵎⴽⵍⵍⵉ ⵉⵙⵙⵔⵇⴰⴱ ⵅⴼ ⵓⵙⵎⴰⴷ ⵏ ⵜⵎⵙⴽⵔⵉⵏ ⵜⵉⵎⵢⴰⵇⵇⴰⵏⵉⵏ ⵉⵥⵍⵉⵏ ⵙ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵜⵓⵎⵙⵉⵙⵜ ⵏ ⴽⵔⴰ ⵏ ⵜⵖⵎⵔⵉⵏ ⵏ ⵉⵣⵣⵔⴰⴼⵏ ⴷ ⵜⵏⵜⵜⴰⵎⵉⵏ ⵜⵉⴳⵔⴰⵖⵍⴰⵏⵉⵏ ⵏⵏⴰ ⵜⵙⵖⵣⵏ ⵜⴳⵍⴷⵉⵜ.

ⴳ ⵎⴰⴷ ⵉⵥⵍⵉⵏ ⵙ ⵓⵎⵢⴰⵖ ⵏⵏⵙ ⴷ ⵡⴰⵣⵣⴰⵏⵏ ⴷ ⵓⵙⴷⴷⵉⴷ ⵏⵏⵙ ⵅⴼ ⵜⵉⵏⴷⵉ ⵏ ⵜⴷⵔⴰⵡⵜ ⵏⵏⵙⵏ ⴳ ⵜⵎⵙⴰⵔⵉⵏ ⵏⵏⴰ ⵜⵏ ⵉⵀⵎⵎⴰⵏ, ⴷⴰ ⵉⵙⵏⴱⴳⵉ ⵓⵙⵇⵇⵉⵎ ⵙ ⵡⴰⵣⵣⴰⵏⵏ ⵙⴳ ⵜⵙⴳⴳⵯⵉⵏ ⴰⴽⴽⵯ ⵏ ⵜⴳⵍⴷⵉⵜ, ⴳ ⵓⵙⴰⵜⵉ ⵏ ⵉⵏⵎⵓⵇⵇⴰⵔⵏ ⵏⵉⵖ ⴰⵎⵛⴰⵡⴰⵕ ⵏⵉⵖ ⴰⴼⴰⴷ ⴰⴷ ⵉⵜⵜⵓⵙⵙⴼⵍⴷ ⵙ ⵜⵏⵓⵔⵣⵉⵏ ⵏⵏⵙⵏ ⴷ ⵜⵙⵓⵎⴰⵔ ⵏⵏⵙⵏ. ⵉⵙⵏⵎⴰⵍⴰ ⵓⵙⵇⵇⵉⵎ ⴰⵙⴷⴷⵉ ⵏ ⵉⵏⵎⵓⵇⵇⴰⵔⵏ ⵉⵎⵛⴰⵡⴰⵕⵏ ⴰⴽⴷ ⵡⴰⵣⵣⴰⵏⵏ ⴳ ⵓⵙⵡⵉⵔ ⴰⵏⵎⵏⴰⴹ, ⵜⵕⵥⵎ ⵜⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷⴷⵓ ⵜⵎⴰⵜⴰⵔⵜ “ⵏⴽⴽ ⴰⴷ ⵉⵜⵜⵖⵜⴰⵙⵏ ⵜⵓⵖⵓⵍⵜ ⵉⵏⵓ’’ ⵙ ⵓⵙⵎⵀⵍ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵏⵏⴰ ⵉⴳⴰⵏ ⵢⴰⵏ ⵙⴳ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵏ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵙ ⵓⵙⴷⴷⵉⴷ ⵏ ⵜⵉⵏⴷⵉ ⵏ ⵓⵙⵙⴼⵍⴷ ⵙ ⵉⵎⵏⴰⴷⵏ ⵏ ⵡⴰⵣⵣⴰⵏⵏ ⴷ ⵢⵉⴷⵉⵔⵏ ⵏⵏⵙⵏ ⴳ ⵎⴰⴷ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏⵏⵙⵏ ⴷ ⵜⵏⴽⵔⴰ ⵙⵉⵙⵏ, ⴳ ⵓⵎⵏⵉⴷ ⵏ ⵓⵙⵎⴰⵔ ⵏ ⵓⵏⵇⵇⵉⵙ ⵉⵥⵍⵉⵏ ⵙⵉⵙⵏ ⵏⵏⵉ ⵔⴰⴷ ⵉⵜⵜⵓⵙⵎⵏⵉⴷ ⵉ ⵜⵙⵇⵇⵉⵎⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵎⵙⴰⴷⴰⵖ ⴰⴽⴷ ⵓⵏⵇⵇⵉⵙ ⴰⵏⴰⵎⵓⵔ.

ⵉⵙⵡⵓⵔⵉ ⵓⵙⵇⵇⵉⵎ ⵓⵍⴰ ⵅⴼ ⵓⵙⴽⴰⵔ ⵏ ⵓⵙⴰⵢⵔⴰⵔ ⵉⵏⵏⵓⵕⵥⵎⵏ ⵉ ⵡⴰⵣⵣⴰⵏⵏ ⴰⴼⴰⴷ ⴰⴷ ⵙⵏⴼⵍⵏ, ⵙⵉⵡⵍⵏ, ⵎⵢⴰⵖⵏ ⵅⴼ ⵜⵎⵙⴰⵔⵉⵏ ⵏⵏⴰ ⵜⵏ ⵉⵀⵎⵎⴰⵏ ⵙ ⵜⵥⵍⴰⵢⵜ ⵏ ⵜⵉⵣⵉ ⵉⵙⵜⴰⵡⵀⵎⵎⴰⵏ ⴳ ⵓⵖⴰⵡⴰⵙ ⵏ ⵜⵉⵍⴰⵍ ⵏⵏⵙ ⴳ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ, ⵍⵍⵉⵖ ⵜⴳⴰ ⵜⴷⵔⴰⵡⵜ ⵏ ⵉⵎⵥⵢⴰⵏⵏ ⴳ ⵓⵙⴰⵢⵔⴰⵔ ⵏ ⵓⵙⵇⵇⵉⵎ ⵢⴰⵜ ⵜⵎⵢⵓⵔⵜ ⵜⴰⵙⴳⵯⵙⴰⵏⵜ, ⴷⴰ ⴳⵉⵙ ⵜⵜⵏⵢⴰⵍⴽⴰⵎⵏ ⵡⴰⵣⵣⴰⵏⵏ ⴷ ⵓⵙⵇⵇⵉⵎ ⴳ ⵓⵙⴰⵜⵉ ⵏ ⵉⵏⵎⵓⵇⵇⴰⵔⵏ ⵏⵏⵓⵕⵥⵎⵏⵉⵏ, ⵉⵏⴰⵥⵓⵕⵏ ⴷ ⵉⴷⵍⵙⴰⵏⵏ ⴷ ⵜⵙⴰⵡⵔⵉⵏ ⵜⵉⴼⵔⴰⵔⵉⵏ ⴷ ⵜⵎⵢⴰⵖⵉⵏ ⵖ ⵜⵜⴼⵙⴰⵔⵏ ⵜⵓⴳⵜ ⵏ ⵜⵉⵍⴰⵍ ⵏⵏⵙⵏ ⵜⵉⵏⴰⵥⵓⵕⵉⵏ ⴷ ⵜⵎⵙⵓⵔⴰⵔⵉⵏ ⴷ ⵜⴷⵍⵙⴰⵏⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ.

ⵉⴳⴰ ⵉⵎⵉⵙ ⴰⵏⴰⵎⵓⵔ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏⵏ ⵉⵎⵉⵙ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵓⴼⵔⴰⴳ ⵏ ⵡⴰⵣⵣⴰⵏⵏ ⵙⴳ ⵜⵉⵕⵥⵉⵢⵉⵏ ⵏⵏⵉ ⵙ ⵣⵎⵔⵏ ⴰⴷ ⵜⵏⵜ ⵎⵏⴰⵍⴰⵏ, ⴰⵔ ⵜⵙⵡⵓⵔⵉ ⵅⴼ ⵇⴰⵃ ⵓⵙⵎⵉⵍ ⵏ ⵡⴰⵣⵣⴰⵏⵏ ⵏⵏⵉ ⵉⵍⵍⴰⵏ ⴳ ⵉⴳⴳⵉ ⵏ ⵡⴰⴽⴰⵍ ⴰⵏⴰⵎⵓⵔ ⴱⵍⴰ ⵃⵜⵜⴰ ⴽⵔⴰ ⵏ ⵓⵙⵏⵓⵃⵢⵓ, ⴷ ⴰⵔ ⵜⵙⵡⵓⵔⵉ ⵙ ⵓⵎⵙⴰⵙⴰ ⴰⴽⴷ ⵉⵎⵏⵣⴰⵢⵏ ⵉⵏⵉⵍⴰⵏⵏ ⵏ ⵜⵙⵇⵇⵉⵎⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⵙⵍⴰⵡⴰⵏ ⴰⴽⴽⵯ ⵜⵉⴷ ⵉⵜⵜⵢⴰⵡⴱⴷⴰⵔⵏ ⴳ ⵉⵅⴼⴰⵡⴰⵍⵏ ⵉⵎⴰⵜⴰⵢⵏ 2 ⴷ 5.
ⵉⵙⴷⵍ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵎⵉⵙ ⴰⴷ ⵍⵍⵉⵖ ⵉⴳⴰ ⵜⵉⵎⵔⵙⵍⵜ ⵜⴰⴷⵙⵜⴰⵔⵜ ⵙ ⵓⵎⵙⴰⵙⴰ ⴷ ⵓⵙⵍⴳⵏ ⵏⵏⵙ ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏⵏⵙ. ⴷ ⴰⵔ ⵉⵙⵡⵓⵔⵉ ⵉⵎⵉⵙ ⵙ ⵓⵎⵙⴰⵙⴰ ⴷ ⵓⵎⵉⵔⵓ ⴰⵖⴰⵔⴰⵏ ⵉⴱⴷⴷⵏ ⵅⴼ : ⴰⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (1948), ⴷ ⵓⵍⵖⵓ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ (1959) ⴷ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ (1989) ⴷ ⵉⴱⵕⵓⵜⵓⴽⵓⵍⵏ ⵏⵏⵙ ⴰⵔⵓⵛⵛⵉⵍⵏ, ⴷ ⵓⴷⵓⵙⵜⵓⵔ ⵏ ⵜⴳⵍⴷⵉⵜ.

ⵉⵥⵍⵉ ⵓⵙⵍⴳⵏ ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ, ⵜⵉⵡⵓⵔⵉⵡⵉⵏ ⴷ ⵜⵥⵍⴰⵢⵉⵏ ⵏ ⵉⵎⵉⵙ, ⵜⵏⵜ ⵉⴳⴰⵏ ⴷ :

-ⵉⵎⵉⵥ ⵏ ⵜⵏⵓⵔⵣⵉⵏ ⵏ ⵡⴰⵣⵣⴰⵏⵏ ⵓⵏⴳⵉⵙⵏ ⵏ ⵜⵕⵥⵉⵢⵉⵏ ⵏⵉⵖ ⵜⵉⵏ ⵡⴰⵏⵏ ⵜⵏ ⵉⵙⵎⵉⵔⵉⵏ ⵏⵉⵖ ⵜⵉⵏ ⵓⴳⴳⵉⴷⵏ ⵢⴰⴹⵏⵉⵏ ;

-ⵉⴳⵉ ⵏ ⵇⴰⵃ ⵉⵙⴰⴳⴳⵯⵏ ⵣⴷⵉⵏⵉⵏ ⵙ ⵜⵏⵓⵔⵣⵉⵏ ⵉⵜⵜⵢⴰⵎⴰⵥⵏ ⴷ ⵜⵖⵓⵔⵉ ⵏⵏⵙⵏⵜ ⴷ ⵓⵙⵎⴽⵍ ⵏⵏⵙⵏⵜ ⴷ ⵜⵖⵜⴰⵙⵜ ⴼⵍⵍⴰⵙⵏⵜ ;

-ⴰⵙⵏⵎⴰⵍⴰ ⵏ ⵜⴳⵉⵡⵉⵔⵉⵏ ⵏ ⵓⵙⵙⴼⵍⴷ ⴷ ⵜⵖⵓⵔⵉ ⵉ ⵜⴼⵓⵍⵉⵏ ⴳⴰⵏⵉⵏ ⵜⵉⵎⵏⵜⴰⵢⵉⵏ ⵙ ⵉⵎⵔⵙⵉ ⵏ ⵜⵕⵥⵉ ⵏⵉⵖ ⵜⴰⵏⵓⵔⵣⵉⵜ ;

-ⵉⵣⵎⵔ ⵉⵎⵉⵙ ⴰⴷ ⵉⵎⵏⴰⵍⴰ ⵙ ⵜⵡⵉⵍⴰ ⵜⴰⵡⵓⵔⵎⴰⵏⵜ ⴽⵔⴰⵢⴳⴰⵜ ⴰⴷⴷⴰⴷ ⵙⴳ ⵡⴰⴷⴷⴰⴷⵏ ⵏ ⵜⵕⵥⵉ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⵏⵏⵉ ⵜ ⵉⴷ ⵉⵜⵜⴰⵡⴹⵏ ;

ⴳ ⵓⵙⵡⵉⵔ ⵏ ⵜⵎⵙⴽⵔⵜ ⵜⴰⵎⵢⴰⵇⵇⴰⵏⵜ, ⴷⴰ ⵢⴰⵇⵇⵔⴰ ⵓⵙⵇⵇⵉⵎ ⵙ ⵉⵏⵇⵇⵉⵙⵏ ⵏⵏⵙ ⵙ ⵓⵙⵎⵀⵍ ⵏ ⵜⵎⵢⴰⵇⵇⴰⵏⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵉ ⵓⴼⵔⴰⴳ ⵏ ⵡⴰⵣⵣⴰⵏⵏ ⵙⴳ ⵓⵙⵖⵍⵍⴰ ⴷ ⵜⴰⴷⵓⵜ ⵜⴰⵡⵙⵢⴰⵏⵜ (ⵜⴰⵎⵢⴰⵇⵇⴰⵏⵜ ⵏ ⵍⴰⵏⵣⴰⵕⵓⵟⵉ) ⴷ ⵓⴱⵕⵓⵜⵓⴽⵓⵍ ⴰⵔⵓⵛⵛⵉⵍ ⵡⵉⵙ ⴽⵕⴰⴹ ⵏ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⵉⵣⴷⵉⵏ ⵙ ⵓⵙⵎⵏⵉⴷ ⵏ ⵉⵙⵉⵡⴹⵏ ⵉ ⵓⵙⴷⵓⵙ ⵏ ⵓⵏⴰⴳⵔⴰⵡ ⴰⵏⴰⵎⵓⵔ ⵏ ⵓⴼⵔⴰⴳ ⵏ ⵡⴰⵣⵣⴰⵏⵏ ⵙⴳ ⵜⴽⵕⴹⵉ ⵜⴰⵡⵙⵢⴰⵏⵜ ⵏⵏⴰ ⵉⵜⵜⵎⵢⴰⴷⴰⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⴹⴼⴼⵓⵕ ⴷ ⵓⵙⵜⴰⵍ ⵏ ⵡⴰⴷⴰⴼ ⵏ ⵡⴰⵣⵣⴰⵏⵏ ⵙ ⵓⵣⵔⴼ ⵏⵏⵙⵏ ⴳ ⵓⴼⵔⴰⴳ ⴰⵎⵙⵉⴷⴼ (protection intégrée).

ⵙ ⵜⵎⵔⵏⵉⵡⵜ ⵅⴼ ⵓⵙⵎⴰⴷ ⵏ ⵜⵓⵎⵙⵉⵙⵜ ⵏ ⴽⵔⴰ ⵏ ⵜⵙⴳⴳⵯⵉⵏ ⵏ ⵉⵣⵣⵔⴰⴼⵏ ⵉⵏⴰⵎⵓⵔⵏ ⴷ ⵢⵉⵎⴰⵏ ⵏ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⴷⴷⵉⴷ ⵓⵙⵇⵇⵉⵎ ⵅⴼ ⵜⵉⵏⴷⵉ ⵏ ⵓⵙⵎⵀⵍ ⴷ ⵓⵙⵎⴰⵜⴰ ⵏ ⵉⴳⵔⴰⵡⵏ ⵉⴽⴰⵍⴰⵏⵏ ⵉⵎⵙⵉⴷⴼⵏ ⵏ ⵓⴼⵔⴰⴳ ⵏ ⵜⵎⵥⵉ 2015-2025, ⵜⴰⵥⵕⵉⴳⵜ ⵏ ⵓⵙⵍⴳⵏ ⵉⵥⵍⵉⵏ ⵙ ⵡⴰⵣⵣⴰⵏ ⴷ ⵓⵙⵔⵓⵙ ⵏ ⵓⵙⵇⵇⵉⵎ ⴰⵎⵙⵎⵍⴰⵏ ⵏ ⵜⵡⵊⴰ ⴷ ⵜⵎⵥⵉ.